Mustaqbal media 
Madaxweynaha Dowlad Goboleedka Galmudug Axmed Ducaale Geelle Xaaf ayaa Maanta Xarunta Madaxtooyada Galmudug ee Magaalada Dhuusamareeb kulan kula qaatay Saraakiisha Ciidamada Ammanka.
Saraakiisha iyo Taliyaasha Ciidamada Boliiska ee Gobolada Mudug iyo Galgaduud oo ka qayb galay kulanka ayaa Madaxweyne Xaaf siiyay warbixin guud oo ku saabsan Ammaanka iyo sida ay Ciidamada ugu howlgalaan.
Xaaf ayay u gudbiyeen Saraakiisha Xaaladda Nololeed sida Mushaarka iyo Hubka ay ku howlgalaan Ciidamada Galmudug.
Taliye ku xigeenka Booliiska Galmudug, Taliyaasha Booliiska Degmooyinka Galmudug iyo xubnaha ka horeeyo oo kulanka joogay ayaa la faray in Feejignaan Amni Ciidamada la geliyo.
Sidoo kale Madaxweyne Xaaf ayaa u sheegay in wada shaqeyn wanaagsan ay dhexmarto Saldhigyada Degmooyinka iyo Magaalooyinka ay kamid yihiin Dhuusamareeb, Guriceel, Cadaado, Caabudwaaq, Hobyo iyo kuwo kale.
Madaxweynaha Maamulka Galmudug ayaa saraakiisha Ciidamada Cadaadis saaray wixii ka dambeeyay Qaraxyadii ka dhacay Magaalada Gaalkacyo oo Al-Shabaab ay ku weerareen Xarun uu lahaa Cabdiwali Sh.Cilmi iyo Xirtiisa.
