Talyaaniga oo sheegay in Dalal Soomaaliya ay kamid tahay ay u qorsheyeen Mashaariic Cusub.

Roma:- Wasaaradda Arrimaha Dibadda Talyaaniga ayaa sheegtay in ay ansixisay 12 Mashruuc cusub oo lagu bixin doono howlaha Bani aadamninada.
War kasoo baxay Kulan ka dhacay Qasrig Wasaaradda Arrimaha Dibadda Talyaaniga ee ku taalla Magaalada Roma (Palazzo della Farnesina in Rome) ayaa lagu ansixiyay mashaariicdaan cusub.
Qiimaha lacageed ee ku baxaya waxaa lagu sheegay in ay dhan tahay 3.5 Milyan oo Yuuro, dhowaanne ay ku dhaqaaqi doonto Waaxda Kaalmada Dowladaha u qaabilsan Wasaaradda Arrimaha Dibadda Talyaaniga.
Dalalka ay u qorsheeyeen in si gaar ah ugu faaiideystaan waxaa kamid ah:- Libya, Palestine, Iraq, Afghanistan, Somalia, Colombia, Congo, Sudan iyo Jordan.
Mashaariicdaan Xukuumadda Roma ay fulineyso waxa ay tilmaamtay in ay Soo marin Doonto Laanqeyta Cas iyo Hay’adda Qarmada Midoobe u qaabilsan Howlaha Miinooyinka ee (UNMAS).
Waxyaabaha sida gaar ah loogu fulin doono lacagtaan waxa ay Wasaaradda Arrimaha Dibadda Talyaniga ku sheegtay in ay kamid yihiin Hormarinta Deegaanka, ka shaqeynta Adeegyada Caafimaadka, Waxbarashada iyo wax ka qabashada Khatarta Miinooyinka.
Wasaaradda ayaa sheegtay in Deeqahani ay taageeri doonaan dhaqdhaqaaqa cilmi baarista iyo ololayaasha wacyigalinta iyada oo loo marayo heshiisyada caalamiga iyo kan Dowladaha u degsan.
Emmanuelle del Re oo ah Wasiir ku xigeenka Wasaaradda Arrimaha Dibadda iyo Iskaashiga Caalamiga Talyaaniga ayaa sheegtay in ay rajeyneyso in ay ka faaiideystaan dalalka ay u qorsheeyeen Mashaariicda Cusub.
Talyaaniga waxaa dhowaan tagay Madaxweynaha Dowladda Federaalka Soomaaliya Maxamed Cabdullaahi Maxamed Farmaajo oo Madaxda dalkaas kala hadlay Xoojinta Xiriirka labada dal.