Adis ababa: Cabdi Maxamuud Cumar oo mar kale maxkamad ka soo muuqday

Maxkamadda darajada 4aad ee Federaalka dalka Itoobiya waxaa maanta ka soo hormuuqday Cabdi Maxamuud Cumar oo ah Madaxweynihii hore ee dowlad Degaanka Soomaalida.

Cabdi Maxamuud Cumar ayaa maanta Maxkamadda ka hor sheegay in dhamaan eedaha loo jeediyay ay yihiin kuwo been ah oo la abaabulay.

Waxaa uu sidoo kale sheegay in dad dano gaar ah leh ay soo ururiyeen eedaha tirada badan ee ay maxkamadda ku soo oogtay.

Qareennada Difaacaya Cabdi ayaa cabasho u gudbiyay Maxkamadda waxaana ay sheegeen in eedeeyayaasha aysan heysan caddeyn ku filan kiiskooda

Dacwadda maanta ayaa dib loo dhigay mar kale ilaa 13ka Bishan Februay,waxaana ay Maxkmadda dalbadatay in dacwad oogayaasha ay soo dhameystiraan marqaatiyada iyo caddeymaha kale ee loo hayo Cabdi Maxmauud Cumar.

Sidoo kale Maxkamadda ayaa 27ka Bishan u qabatay in la hor keeno xubnaha kale ee la xirnaa Cabdi Maxamuud Cumar,maaddaama maanta uu kaligiis ka soo muuqday.

Xubnaha kale ee xiran waxaa ka mid ah; C/Risaaq Sahane Cilmi, madaxii hore ee guddiga qurbe joogta, Raxmo Maxamed Haybe oo ahayd madaxii Waaxda Haweenka iyo Carruurta iyo xubno kale.

Dhinaca kale dacwad oogayaasha ayaa Maxkamadda ka codsaday in ay waqti fiican u siiso sidii ay u soo xiri lahaayeen dadka gacanta dowladda ka maqan ee eedeysanayaasha ah kuwaas oo dalka ka baxsaday.