Xisbiga Himilo Qaran oo ku baaqay in xal degdeg ah loo helo maqnaashaha Puntland ee shirarka GWQ

Xisbiga Himilo Qaran oo ka mid ah Xisbiyada ugu weyn ee dalka ayaa warsaxaafadeed waxa uu ka soo saaray shirkii Golaha Wadatashiga Qaranka, kaas oo Muqdisho lagu soo gabagabeeyey May 17, 2024-ka, iyada oo ay ka soo qeyb galeen madaxda dowladda dhexe iyo kuwa Maamul Gobaleedyada marka laga reebo Puntland.

Warka ka soo baxay Xisbiga uu Hoggaamiyo Madaxweynihii hore ee Jamhuuriyadda Federaalka Soomaaliya ahna xubin ka tirsan Baarlamaanka Soomaaliya Shariif Sheekh Axmed ayaa madaxda Golaha Wadatashiga Qaranka u soo jeediyey in mudnaan gaar ah la’iska saaro xaaladda cimillada adduunka oo saameyn ku yeesha geeska Afrika.

“Maadaama cimilada adduunku isbedel ku dhacay, gaar ahaan geeska Afrika, in ay cayimaan quburo diyaarisa qaabka ugu haboon ee loola tacaali karo fatahaadaha iyo daadadka roobka ee soo noqnoqday iyo sida ugu wanaagsan ee loogu gurman karo dadka ay roobka waxyeeleeyeen, una soo bandhigaan shacanka raba in ay u gurmadaan walaalahood,” sida lagu yiri warsaxaafadeedka ka soo baxay Xisbiga.

Xisbiga ayaa Golaha Wadatashiga ugu baaqay in si degdeg ah xal loogu helo ka maqnaasha shirka maamulka Puntland oo shirarkii ugu dambeeyey aysan qeyb ka ahayn, “Mabaadii’da uu kudhisanyahay Golaha Wadatashiga Qaran waa wadar ogol, waxaan ogsoonahay in dhowr shir ay Puntland ka maqantahay, sidaa daraadeed waa in xal deg deg ah loo helaa kala maqnaansha GWQ.”

Sidoo kale Xisbiga ayaa xusay in ay muhiim tahay sidii mas’uuliyad gaar la’isaga saari lahaa khilaafka ka taagan qaabka dhameystirka Dastuurka, iyo in dib u eegisa lagu sameeyey qorashaha dagaalka ka dhanka ah Al-Shabaab oo dalka ka socda.

Warsaxaafadeedka ka soo baxay Xisbiga Himilo Qaran ayaa ku soo beegmaya xilli todobaadkii hore Muqdisho lagu soo gabagabeeyey shirka Golaha Wadatashiga Qaranka, kaas oo laga soo saaray Warsaxaafadeed mugdi galiyey qodobadii ugu muhiimsanaa ee madaxdu kuwada gorfeeyeen shirka.

Halkaan hoose ka akhriso warsaxaafadeedka oo dhameystiran

Mustaqbal