Xildhibaan Farxiya Muumin “Buule Burde waxa ay u baahan tahay in go’doonka laga saaro”.

Xildhibaan Farxiyo Muumin Cali oo kamid ah Xildhibaanada Golaha Shacabka ee Deegaan Doorashadoodu tahay Hir-Shabeelle ayaa Mustaqbal u sheegtay in go’doonka Saaran Degmada Buule Burde uu saameyn ku yeeshay dadka Degmadaasi.

Waxa ay soo jeedisay in laga wada shaqeeyo sidii dhibaatada ka jirta Magaalada oo ay ugu horeyso Xannibaadda Al-Shabaab ay saareen looga saari lahaa.

Tusaale waxa ay usoo qaadatay in ay ka xanniban tahay Magaalooyinka Muqdisho iyo Baladweyne, taasina ay leedahay Saameynteeda.

XIldhibaan Farxiya Muumin ayaa intaa ku dartay in Wax soo saarka Beeraha uu sarreeyo, balse caqabadda jirta ay tahay in aysan u iib geyn karin Suuqyada ka baxsan Degmada.

Xildhibaanad Farxiya; waxa ay tilmaamtay in Odoyaasha dhaqanka ay kala hadashay sida looga gudbi karo Fatahaadda Wabiga uu ku sameeyo Magaalada Buule Burde.

Xildhibaanada Hir-Shabeelle ee kasoo jeeda Degmada ayay sheegtay in ay kaalin muuqata ay ka qaateen soo bandhiggidda Dhibaatooyinka lasoo dersay Dadka Degmada.

Ugu dambeyn waxa ay Xildhibaan Farxiyo Muumin Cali Mustaqbal Radio u sheegtay in ay Xakameyn u baahan yihiin qoysaska ka barakacay Colaadda iyo Abaarta ee degen Xeryaha ay ka dhisteen Buule Burde.

Xildhibaanada Golaha Shacabka oo ku jira Fasax, waxa ay dib ugu laabteen Deegaan Doorashadooda si ay ula soo kulmaan Dadka ay ku matalaan Golaha Shacabka, si ay ugu daraan warbixinada ay gudbinayaan kolka uu furmo fadhigooda.