Wasiirrada cusub oo maanta la dhaariyay

Guddiga joogtada ah ee Golaha shacabka Soomaaliya,ayaa maanta dhaariyay xubnaha cusub ee ka mid noqonaya Golaha Wasiirrada Xukuumadda Xasan Cali Kheyre kuwaas oo dhawaan la magacaabay.

Xubnaha maanta la dhaariyay ayaa Sabtigii loo magacaabay in ay ka mid noqdaan Golaha Wasiirrada waxaa ay kala yihiin  Afar wasiir,hal Wasiiru dowle iyo hal Wasiir ku xigeen.

Munaasibadda Dhaarinta Xubnaha ayaa waxaa ay ka dhacday Xarunta Golaha shacabka waxaana goobjoog ahaa Guddoomiyaha Golaha shacabka,ku xigeenkiisa 1aad, Ra’isalwasaare ku xigeenka Xukuumadda iyo qaar ka mid ah xubnaha kale ee Golaha Wasiirrada Soomaaliya.

ku simaha Ra’isal Wasaaraha ahna Ra’isal Wasaare ku xigeen Mudane Mahdi Maxamed Guuleed Khadar ayaa sheegay in xubnahaan cusub ay qeyb ka yihiin barnaamijka dardar gelinta xukuumada.

“ Mudane guddoomiye waxa sharaf weyn inoo ah inan idiin soo gudbino lix masuul oo golaha wasiirada ku soo biiray oo afar ka mid ah ay halkaan joogaan, mudane guddoomiye masuuliyiintan maanta la dhaariyay waxa ay qeyb ka tahay dargelinta barnaamijka weyn ee xukuumada iyo in dhiig cusub lagu shubo si loo gaaro hadafka xukuumada” ayuu yiri Ra’isal Wasaare ku xigeenka xukuumadda.

Guddoomiyaha golaha shacabka Mudane Maxamed Mursal Sheekh C/raxmaan ayaa wasiirada cusub kula dardaarmay iney si sax ah shaqadooda u gutaan.

“ Golaha shacabaka waxa uu furmi doonaa 10-ka September wasiirada xildhibaanada ah waxa ka rabnaa iney kulamada golaha soo xaadiraan oo ay labada shaqo si wanaagsan u gutaan” ayuu yiri guddoomiyaha golaha shacabka.

Mudanayaasha maanta la dhaariyay waxa ay kala yihiin:-

1. Mudane C/llaahi Goodax Barre Wasiirka Wasaarada Waxbarashada iyo tacliinta sare.

2. Mudane Xuseen Maxamuud Sheekh Xuseen Wasiirka Wasaarada Xanaanada Xoolaha.

3. Mudane C/qaadir Sheekh Cali Ibraahim (Baqdaadi) Wasiiru dowlaha Madaxtooyada Soomaaliya.

4. Mudane Saqar Ibraahim Cabdalle Wasiir ku xigeenka Wasaarada shaqada iyo shaqaalaha.

Dhanka kale Guddiga joogtada ee golaha shacabka BJFS ayaa maanta warbixin ka dhageystay guddiga madaxa banaan ee xuduudaha iyo Federaalka.

—DHAMMAAD—