Soomaalida u safarta Masar oo dhibaato ku qabta Garoonka diyaaradaha Qaahira

Soomaalida u safarta Jamhuuriyadda Carbeed ee Masar ayaa dhibaato kala kulanta Garoonka Diyaaradaha ee Qaahira, waxa ay cabasho u gudbiyeen Dowladda Federaalka Soomaaliya iyo safaaradda Soomaaliyeed ee dalkaas si wax looga qabto.

Dadkaan oo Masar u taga arrimo kala duwan sida; Caafimaad, Waxbarasho, Dalxiisa, iyo Deegaan ayaa caqabad horleh ku noqotay dad badan oo sanadihii lasoo dhaafay dalkaas u safrayay.

Dadka dhibaatooyinka la kulmay kana cabanaya waxaa kamid ah Garsooraha Soomaaliyeed ee Cumar Cabdulqaadir Cartan oo qoraal uu arrintaan uga hadlay soo dhigay bartiisa Facebook isaga oo ku baaqay in Dowladdu soo farageliyo.

“Masar dadka Soomaaliyeed ee Caafimaadka, deeganka iyo xita transit ka ku maraya dalkeeda Bahdilka iyo Ciqaabta ay Garoonkooda ku marsiiyaan wax loo dulqaadan karo ma ahan,” sida uu yiri Garsoore Cartan.

Sidoo kale Garsooraha ayaa dowladda Soomaaliya ka codsaday in wax laga qabto dhibaatada lagu hayo shacabka Soomaaliyeed, isaga oo yiir “Dowlad haddaa leenahay waxaan ka codsanaya xannuunka shacabka Soomaaliyeed ay dadkan xaasidka ah ay marsiinayaan in ay kala hadlaan.”

Dowladaha Soomaaliya iyo Masar ayaa horay u kala saxiixday heshiis la xiriira in Baasaboorka Diblumaasiga ah qofka haysta si bilaash ah uu ku helayo fiisaha, balse weli kama wada hadlin sida socdaalkooda loogu fududeen lahaa muwaadiniinta Soomaaliyeed ee heysta Baasaboorka caadiga ah.

Mustaqbal