Maamulka Galmudug oo qaadacay eedeyn uga timid maamul goboleedka Puntland

Maamulka Galmudug ayaa ka falceliyay eedeyn uga timid Puntland kaddib markii Xukuumadda Siciid Deni ay ku eedeysay in Garoomada Diyaaradaha iyo dhulka maamulkaas loo adeegsado ciidamo ay ku sheegtay in ay caqabad ku yihiin maamulkooda.

Wasiirka Qorshaynta, Maalgashiga & Horumarinta Dhaqaalaha Maamulka Galmudug, Cabdiraxmaan Axmed Xayle oo la hadlay BBC SOMALI ayaa beeniyay jiritaanka warkaas isaga oo xusay in labada maamul goboleed uu ka dhaxeeyo cilaaqaad wanaagsan.

Xayle ayaa shaaciyay in aanay jirin sabab keeni karta in dad dhibaato ku ah Maamulka Puntland ay dhankooda marin u noqdaan, waxa uu usoo jeediyay Xukuumadda Deni in ay xal u raadiso arrimaha ka dhex jira deegaannada maamulkaas.

Waxa uu wax laga xumaado ku tilmaamay xaaladda ka dhex jirta deegaannada Maamulka Puntland dusha laga saaro Dowlad-Goboleedyada kale ee xadka la wadaago iyada oo la iska indhatirayo kacdoonkaas gudaha ka socda sida uu hadalka u dhigay.

“Galmudug ma ahan meel looga duullo Puntland, mana jirto howshaas ee eedda ah ee warqadda aan ku aragnay, Muddooyinkii dambe waxaa ka dhex jiray is qabqabsi dadka deegaanka ah oo kacsan, marweliba wax dhexdeeda ah in lagu soo riixo maamul Goboleedyada kale ee waa in arrimaha dhexdheeda Xalisato”. Sida uu yiri Wasiirka Qorshaynta, Maalgashiga & Horumarinta Dhaqaalaha Maamulka Galmudug, Cabdiraxmaan Axmed Xayle

Dhowaan waxa uu Maamulka Puntland uu eedeyn u jeediyay Dowlad-Goboleedka Galmudug iyada oo tan iyo xiligaas la sugayay jawaabka ka imaanaysa dhinaca eedeynta la saaray oo ugu dambayn iska fogeeyay jiritaanka eeddaas.

Mustaqbal