Maxay yihiin eedeymaha Warbaahinta Dowladda Jarmalka ka baahisay Kabtan Ayuub iyo Yacquub Siyaad?

Ayuub Cabdirisaaq oo loogu yeero Kabtan Ayuub iyo Yacquub Siyaad oo ah dhalinyaro caanka ah Baraha Bulshada, ayaa wajahaya eedeymo la xiriira hurin colaad iyo dagaal, sida lagu baahiyay warbixin ay diyaarisay Warbaahinta Dowladda Jarmalka ee DW.

Warbixinta oo ah mid dheer ayaa waxaa ku jira caddeymo muuqaalo iyo sawirrada Ayuub Abdirasaaq oo lagu eedeynayo inuu dhiirrigeliyay colaadaha iyo dagaallada ka socda gudaha dalka ayaa la sheegay inuu Jarmalka tagey sannadkii 2017. Inkastoo sannadkii 2020 la diiday codsigiisii magangelyo, wuxuu sii joogay dalkaasi, isagoo wata sharci ku meel gaar ah.

Wuxuu Baraha Bulshada ku baahiyay gaar ahaan TikTok muuqaal uu kaga hadlayo dagaal, hub, iyo weerar uu kula taliyay taageerayaashiisa, isaga oo ballanqaadyo lacageed sameynaya.

Warbaahina DW ayaa caddeyn ahaan u isticmaalay muuqaalo Kabtan Ayuub oo xiran dharka ciidanka, isaga oo sita sita hub ayna la socdaan ciidamo hubeysan.

Si gaar warbixinta waxaa ay sheegtay inuu xiriir dhow ka dhaxeeyo Madaxweynaha Puntland, Saciid Cabdullaahi Deni iyo Kabtan Ayuub.

Warbixinta DW ayaa sidoo kale soo qaadatay Yacquub Siyaad oo isagana kamid ah dadka Caanka ka ah Baraha Bulshada, isla markaasna lagu eedeynayo hurinta colaad iyo dagaal.

Yacquub wuxuu safarro ku yimid Soomaaliya, halkaas oo lagu arkay isagoo la kulmaya kooxo hubeysan. Inkastoo uu hadda ku sugan yahay Jarmalka, haddana waxaa baaraya Booliiska dalkaasi.

Dhinaca kale, Kabtan Ayuub ayaa isna wajihi kara dambiyo la xiriira abaabulka dagaal haddii uu ku laabto Yurub.

Yacquub iyo Ayuub weli kama aysan hadlin eedaha culus ee uu ka baahiyay Telefishinka Dowladda Jarmalka ee DW.

Mustaqbal