Soomaaliya iyo WFP oo ka wada hadlay ka jawaabida xaaladda binu aadanimo

Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cali Dhaay, ayaa xarunta Wasaaradda ee Muqdisho kula kulmay Mr. Elkhidir Daloum, oo ah Wakiilka iyo Agaasimaha Barnaamijka Cunnada Adduunka (WFP) ee Soomaaliya.

Kulanka ayaa diiradda lagu saaray xoojinta iskaashiga u dhexeeya Dowladda Federaalka Soomaaliya iyo hay’adda WFP, gaar ahaan dhinacyada ka jawaabista xaaladaha bini’aadantinimo, dhisidda adkaysiga bulshada, iyo taageeridda barnaamijyada horumarineed ee waara ee dalka.

Wasiir Cabdisalaan Dhaay ayaa uga mahadceliyey WFP taageerada joogtada ah ee ay siiso bulshada Soomaaliyeed ee ay saameeyeen abaaraha, fatahaadaha, barakaca, iyo cunno yari, isagoo xusay in iskaashiga dowladda iyo hay’adaha caalamiga ah uu muhiim u yahay xasilloonida iyo horumarka waara ee Soomaaliya.

Dhankiisa, Mr. Elkhidir Daloum ayaa mar kale xaqiijiyey sida WFP uga go’an tahay taageeridda mudnaanta qaranka Soomaaliya, isagoo tilmaamay in barnaamijyada hay’addu ay diiradda saarayaan caawinta cuntada, quudinta carruurta dugsiyada, barnaamijyada nafaqada, iyo soo celinta ilaha nololeed ee bulshada.

WFP ayaa kamid ah Hay’addaha caalamiga ah ee Soomaaliya ka taageera dhinaca gargaarka binu aadanimada iyo gurmadka abaaraha.

Mustaqbal