Maxay ka wada hadleen Ra’iisul wasaare Xamse iyo Safiirka Midowga Yurub?

Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa xafiiskiisa ku qaabilay Danjiraha cusub ee Midowga Yurub u qaabilsan Soomaaliya, László Eduárd Máthé, iyaga oo ka wada hadlay xoojinta xiriirka iyo iskaashiga istiraatiijiga ah ee labada dhinac.

Kulanka ayaa diiradda lagu saaray iskaashiga dhinacyada amniga, horumarinta dhaqaalaha, dowlad-dhiska, taageerada hay’adaha dowladda iyo hirgelinta qorshayaasha horumarineed ee mudnaanta u leh Soomaaliya.

Ra’iisul Wasaare Xamsa Cabdi Barre ayaa uga mahadceliyey Midowga Yurub taageerada joogtada ah ee uu siiyo Dowladda Federaalka Soomaaliya, isaga oo adkeeyey muhiimadda ay leedahay sii xoojinta iskaashiga ku dhisan danaha wadajirka ah, nabadda iyo horumarka dalka.

Ra’iisul Wasaaruhu waxa uu sidoo kale danjiraha la wadaagay warbixin ku saabsan horumarka laga gaaray amniga, dimuqraadiyadda iyo dowlad-dhiska, isaga oo xusay in Xukuumadda DanQaran ay ka go’an tahay xoojinta dowladnimada, xaqiijinta amniga, kobcinta dhaqaalaha iyo horumarinta adeegyada bulshada.

Dhankiisa, Danjiraha cusub ee Midowga Yurub ayaa xaqiijiyey muhiimadda uu Midowga Yurub siinayo xiriirka Soomaaliya, isaga oo muujiyey sida ay uga go’an tahay sii wadidda wada-shaqaynta lagu taageerayo nabadda, xasilloonida iyo horumarka dalka.

Mustaqbal