Madaxweynaha JFS Xasan Sheekh Maxamuud oo Dalka dib ugu soolaabtay.

Madaxweynaha Jamhuuriyadda Federaalka Soomaaliya Xasan Sheekh Maxamuud iyo wafdi uu Hoggaaminayo ayaa galabta dalka dib ugu soo laabtay ka dib markii uu safar ugu maqnaa Dalka Turkiga uu casuumaad ka helay Madaxweynaha Dalkaas.

Garoonka Caalamiga ee Aadan Cadde ayaa wafdiga Madaxweynaha waxaa ku soo dhaweeyay Agaasime ku xigeenka Madaxtooyada Soomaaliya Maxamed Amiin Sheekh Cusmaan iyo wafdi kale, isaga oo Madaxweynaha loo galbiyay Aqalka Dalka loogu arrimiyo ee Villa Soomaaliya.

Safarka Madaxweynaha JFS Xasan Sheekh Maxamuud ee Dalka Turkiga ayaa ku qotomay xoojinta xiriirka diblomaasiyadeed ee labada dal, gaar ahaan dhinacyada amniga, ganacsiga, tababarrada Ciidamada, iyadoo Madaxweynuhu uu u kuur galay xaaladda ee ardayda, ganacsatada iyo jaaliyadda Soomaaliyeed ee dalka Turkiga ku dhaqan.

Qoraal ka soo baxay Madaxtooyada ayaa lagu “Madaxweynaha ayaa ugu hambalyeeyey shacabka Soomaaliyeed munaasabadda barakeysan ee Ciidda Carafo, waxa uuna xusuusiyey xaaladda nololeed ee ay la tacaalayaan kumannaan qoys oo Soomaali ah, ayna mudan yihiin farxadda ciidda in ay la qeybsadaan dadkooda Soomaaliyeed.”

Ugu dambeyn Madaxweynaha oo muwaadiniinta Soomaaliyeed ee gudanaya waajibaadka xajka Alle uga baryey in uu ka aqbalo acmaashooda suubban, ayaa ku borriyey dhammaan shacabkeenna in ay maalmahan badiyaan ducada iyo Alle bariga, istaakuleynta iyo ka warqabka dadkeenna danyarta ah, taas oo ka mid ah acmaasha ugu khayr badan.

Mustaqbal