Madaxweynaha Eretariya oo digniin u diray Itoobiya

Madaxweynaha Eritrea, Isaias Afwerki ayaa si kulul uga hadlay hanka Itoobiya ee ah in ay hesho marin badeed, isaga oo sheegay in haddii Itoobiya isku daydo in ay xoog kula wareegto dekedaha Eritrea, gaar ahaan dekedda Assab, ay arrintaasi sababi karto dagaal cusub oo ka dhex qarxa labada dal ee dariska ah.

Madaxweyne Afwerki, oo waraysi siiyay telefishinka qaranka ee Eri-TV, ayaa ku tilmaamay hamiga Itoobiya ee ah in ay hesho marin badeed “mid khatar ah” oo laga yaabo inuu horseedo dagaal gobolka ka qarxa. Wuxuu yiri:

“Haddii ay Itoobiya u malaynayso in ay ka awood badnaan karto ciidanka Eritrea, qabsan kartana dhulkooda, taasi waa riyo” ayuu yirir Afwerki.

Isaga oo sii hadlaya ayuu ka digay in Itoobiya aysan dadkeeda u soo jiidin dagaal iyo colaad hor leh.

Hadalkan ayaa loo arkaa mid jawaab u ah dhaqdhaqaaqyada Itoobiya ku dooneyso marin badeed ku yaalla Badda cas.

Hore Itoobiya waxaa ay isku dayday in ay saldhig ciidan ka hesho Somaliland, iyada oo heshiis muran dhaliyay 1 bishii Janaayo ee sannadkii hore la saxiixday.

Dowladda Federaalka Soomaaliya ayaa si cad uga hortimid heshiiskaasi, waxaana mowqifkaasi taageeray Masar iyo Turkiga.

Sidoo kale, hadalka Madaxweynaha Eretira ayaa imaanaya xilli Itoobiya ay u shaacisay in ay si buuxda u dhammeystirtay mashruuca biyo-xireenka weyn ee GERD, islamarkaana ay casuumad rasmi ah u dirtay dalal kala duwan si ay uga qeyb galaan furitaankiisa.

Diblomaasiyiinta gobolka iyo falanqeeyayaasha arrimaha Geeska Afrika ayaa sheegaya in Afwerki inuu doonayo awood gobolka ah iyo inuu ka hortago damaca Itoobiya.

Labada dal waxaa hore u dhexmaray dagaalo qaraar oo dhacay sannadihii 1998 ilaa 2000, inkasta oo heshiis nabadeed la saxiixay 2018

Mustaqbal