Kenya oo dacwad ka gudbisay Dhallinyaro Soomaali ah oo Muuqaallo isaga dhex duubta Waddooyinka Nairobi

Safiirka Soomaaliya ee Kenya, Danjire Jibriil Ibraahim Cabdulle ayaa sheegay in Dowladdaas ay usoo gudbisay dacwad ka dhan ah Dhallinyaro Soomaali ah oo Muuqaallo isaga soo duubta waddooyinka waa weyn ee Magaalada Nairobi.

Jibriil ayaa tilmaamay in qof uu ku dhintay arrintaan halka dad kale ay ku dhaawacmeen, laamaha ammaanka Kenyana ay u sheegeen in ay Safaaradda Soomaaliya ay u istaagayso sidii loo baraarujin lahaa dhallinyaradaas naftooda halista gelineysa.

Bulshada Kenya ee Martida loo yahay ayuu u sheegay Danjire Jibriil Ibraahim Cabdulle in aanay ka tarjumayn dhaqanka Soomaalida balse dadka ficilladaan cusub sameynaya ay yihiin dhallinyaro kooban oo wax laga qaban doonno.

“Waxaa maalmahaan jira barnaamijyo la xiriira dhallinyaro Soomaaliyeed oo waddooyinka waa weyn ee Nairobi sawirro isaga qaado, waa khalad waana dambi, waxa aan leenahay Hoteel ayaad isaga qaadi kartaa, guri ayaa isaga qaadi kartaa oo meelo kale ayaa ku samayn kartaa, muhiim ma ahan in aad gaari isku dhigtid, qof ayaa ku dhintay, dad kale ayaa ku dhaawacmay” Ayuu yiri, Danjiraha Soomaaliya ee Kenya, Jibriil Ibraahim Cabdulle.

Dhallinyarada muuqaallada isaga duubta waddooyinka waa weyn waxaa sidaan oo kale digniin loogu diray Magaalada Muqdisho kaddib markii qaar kamid ah dhallinyaradaas ay halis ku galeen Gawaarida xamuulka qaada oo isku hordhigeen si ay muuqaallo isaga duubaan.

Mustaqbal