Duqa Muqdisho Maxamed Amiir, maxaa u qabsoomay 100ka maalmood uu joogo?

Guddoomiyaha Gobolka Banaadir ahna Duqa Magaalada Muqdisho Maxamed Axmed Amiir ayaa dhammeystay 100kii maalin ugu horreysay, waxa aan maqaalkaan dib ugu eegeynaa waxyaabaha u qabsoomay, waxa ka fulay ballanqaadkiisii iyo caqabadaha weli ka jira Caasimadda.

Duqa Muqdisho waxa uu dhowr jeer ballanqaaday in uu ka shaqeynayo saxmadda ama cariiriga ka jira waddooyinka Magaalada Muqdisho, Nadaafadda, hirgelinta Ilayska Cadceedda ku shaqeeya, Nalalka Samaanfaraha ee Gaadiidka kala haga, in uu ugu dambeynayo mas’uul Gobolka Banaadir loo magacaabo oo wixii hadda ka dambeeya la dooran doonno & kuwo kale.

Maxamed Amiir ayaa weli si buuxda wax ugama qaban nadaafadda Waddooyinka iyo Xaafadaha Magaalada Muqdisho, qashinka iyo waxyaabaha kale ee muujinaya nadaafad darrada ayaa ku dhex arkeysaa jidadka Caasimadda, xili roobaadka waxaa biyo degeen noqda Waddooyin muhiim ah isu socodkooda.

Saxmadda waa kuwo aan isbaddelin, daqiiqado badan ayay mararka qaar kugu qaadaneysaa in ay isaga kala gudbo Xaafado isku dhow oo Magaalada Muqdisho, waxaa loo sababeynayaa in cariirigaas uu dhaliyay nidaamka lagu jiheynayo Gaadiidka Caasimadda oo mararka qaar kuwa xamuulka ah oo waqti weliba socda.

Dowladda Hoose ee Xamar ayaa dhaqaale badan ka hesha Caasimadda sida Guryaha, Gaadiidka, Shirkadaha iyo Suuqyada waana canshuurta sida joogtada ah looga qaado balse ma helaan taas baddelkeeda waana tan keentay dad badan su’aalo dulsaaraan waxa diidan in ay waayaan canshuurtaas ay bixiyeen baddelkeeda.

Shaqada ugu weyn ee Dowladda Hoose ee Xamar oo ah Nadaafadda iyo Hagaagjinta Caasimadda ayaa mararka qaar kusoo koobmata goobaha socodka Madaxda Dowladda ku badan yihiin waana tan keentay in xitaa waddooyinka qaarkood la hilmaamo oo ciidda ama bacaadka ka sare maro kuna dhow in ay burburaan.

Mustaqbal