Qaraxyo loo adeegsaday Gawaari oo ka dhacay Magaalada Baraawe ee Xarunta Dowlad Goboleedka KGS.

Magaalada Baraawe ee xarunta Dowlad Goboleedka KGS balse uusan ku shaqeyn Maamulka waxaa maanta ka dhacay Labo Qarax oo loo adeegsaday Gawaari, waxaana labada Qarax lagu weeraray Saldhig Ciidamada Uganda ay ku leeyihiin Garoonka diyaaradaha ee Degmadaas.

Mas’uuliyiin katirsan Maamulka Degmada Baraawe ayaa Mustaqbal u sheegay in Ciidamada AMISOM ay rasaaseeyeen Gawaarida qaraxyada, midkooda uu ku qarxay afaafka hore halka kan kale meel aan sidaa ugu fogeyn Garoonka diyaaradaha uu ku qarxay.

“Al-Shabaab ayaa Labo Gaari oo ay kusoo rareen walxaha Qarxa isku dayay in ay ku weeraraan Garoonka diyaaradaha Baraawe, balse Ciidamada AMISOM ee ku sugan ayaa fashiliyay, umana suurta galin in gudaha ay galaan Gawaarida” sidaasi waxaa Mustaqbal u sheegay mas’uul katirsan Maamulka Degmada Baraawe.

Waxa uu intaa raaciyay in ciidamada ay baaris wadaan, waxaana uu sheegay in aysan jirin waxyeelo gaartay dadka Shacabka, Askarta Degmada, halka aysan jirin waxyeelo gaartay Ciidamada Uganda ee howlgalka AMISOM ku jira oo ay la wadaageen.

Al-Shabaab ayaa sheegtay in weerar ay u adeegsadeen labo Gaari oo walxaha Qarxa kusoo rareen ku qaadeen Saldhig Ciidamada Uganda ee ku jira Howlgalka Midowga Afrika oo ku yaalla Degmada Baraawe ee Xarunta Dowlad Goboleedka KGS.

Waxa ay intaa ku dareen in Saldhigga ay weerarka ku qaadeen xili hore oo saakay ah uu ku yaallo Garoonka Diyaaradaha Magaalada Baraawe ee Xarunta Maamulka Koofur Galbeed Soomaaliyeed.

Al-Shabaab ma aysan shaacin Khasaaraha ay geysteen weerarada Gawaarida labada ah ay u adeegsadeen, sidoo kale ma jiro war kasoo baxay Ciidamada Uganda iyo howlgalka AMISOM oo ay kaga hadlayaan waxyeelada ka dhalatay Qaraxyada.