Baarlamaanka Waqooyi Bari oo ansixiyay qaraar ka dhan ah Maamulka Waqooyi Galbeed

Fadhi aan caadi ahayn oo ay maanta magaalada Laascaanood ku yeesheen Xildhibaanada Baarlamaanka Dowlad goboleedka Waqooyi Bari ee Soomaaliya, ayaa lagu ansixiyay qaraar dhigaya in maxkamad la soo taago saraakiishii sar-sare ee ciidamada Waqooyi Galbeed ee lagu qabtay dagaaladii ka dhacay gobolka Sool.

Qaraarkan ayaa dhigaya in saraakiisha gacanta lagu hayo lagu qaado dacwado la xiriira duqaymihii ka dhanka ahaa shacabka magaalada Laascaanood iyo dagaaladii sokeeye ee muddada dheer qaatay.

Qaar kamid ah Xildhibaanada Baarlamaanka oo warbaahinta la hadlay kadib fadhiga ayaa sheegay in tillaabadan ay ahayd mid muddo dheer laga sugayay maamulka, balse ay dhowr jeer dib u dhacday duruufo farsamo iyo kuwa amni darteed.

Dagaalkii Goojecadde oo dhacay 25-kii Agoosto, 2023 ayaa ahaa kii ugu cuslaa oo lagu qabtay Saraakiil iyo mas’uuliyiin ka tirsan Maamulka Waqooyi Galbeed.

Dagaalkaas oo yimid kadib ku dhowaad sideed bilood oo ay magaalada Laascaanood ku jirtay go’doon iyo duqaymo joogto ah, ayaa horseeday in gebi ahaanba laga saaro ciidamada Somaliland agagaarka magaalada, taas oo dhalisay isbeddel weyn oo dhanka maamulka iyo amniga ah.

Intii uu socday dagaalkii Gooja-cadde waxaa gacanta lagu dhigay l askari iyo saraakiil sar-sare oo ka tirsanaa milatariga Waqooyi Galbeed oo uu kamid yahay Sareeye Guuto Faysal Cabdi Bootaan.

Lama oga waqtiga rasmiga ah ee Maxkamada la horkeeni doono Saraakiishan ciidan ee ka tirsanaa Maamulka Waqooyi Galbeed.

Mustaqbal