Puntland oo mamnuucday in Militeriga Federaalka ay dhaqdhaqaaqyo ka sameeyaan deegaannada Maamulkaasi

Dowlad Goboleedka Puntland ayaa maanta soo saartay go’aan ay ku mamnuucayaan in ciidamo ka tirsan kuwa Dowladda Federaalka Soomaaliya ay ku sugnaadaan ama ka hawlgalaan deegaannada hoos yimaada maamulkaas.

Go’aankan ayaa soo baxay kulan ay maanta yeesheen Golaha Xukuumadda Puntland, kaas oo uu guddoominayay Madaxweyne Siciid Cabdullaahi Deni, uuna weheliyo Madaxweyne Ku-xigeenka, Ilyaas Cismaan Lugatoor.

Golaha Xukuumadda ayaa si cad u qeexay in Puntland aysan qayb ka ahayn Ciidanka Xoogga Dalka Soomaaliyeed ilaa laga gaarayo heshiis dhammaystiran oo laga gaaro qodobbada masiiriga ah ee ay isku hayaan dowladda Federaalka iyo Puntland.

Sidaas darteed, Goluhu wuxuu faray dhammaan hay’adaha amniga iyo cadaaladda ee Puntland in aan deegaannada Puntland lagu arki karin, lagana dhex gudbi Karin ciidamo iyo gaadiid aan ka tirsanayn Ciidammada qalabka sida ee dowladda Puntland.

Tallaabadan ayaa u muuqata mid looga hortagayo dhaqdhaqaaqyo ay maalmihii u dambeeyay Dowladda Federaalku ka waday gudaha Puntland, kuwaas oo la doonayay in dib loogu hawl-geliyo cutubyo ka tirsan ciidanka xoogga dalka oo horay ugu sugnaa deegaannadaas.

Go’aankan ayaa ku soo aadaya xilli uu khilaafka siyaasadeed u dhexeeya Dowladda Federaalka Soomaaliya iyo maamulka Puntland.

Mustaqbal