Odayaal, Madaxweyne Cagjar ku eedeysay in uu isir sifeyn ku hayo

Odayaal iyo waxgarad ku sugan Magaalada Shillaabo ee Gobolka Qorraxey ayaa Madaxeynaha dowlad degaanka Soomaalida Mustafe Cagjar iyo mas’uuliyiin ka mid ah maamulka ku eedeeyay in ay isir sifeyn ku hayaan beeshooda.

Odayaashan oo la soo xiriiray Idaacadda Mustaqbal ayaa sheegay in madaxa nabad gelyada ee Ismaamulka, midka SHillaabo, Maamulka Magaalada iyo Madaxweynaha Ismaamulka ay raalli ka yihiin dhibaatada lagu hayo mid ka mid ah Beelaha degan Ismaamulka.

Waxaa ay sheegeen in Madaxweyaha iyo maamulka Goholka Qorraxey ay wadaan in ay dadka kale ku beeraan degaannadooda iyagana xoog looga saarayo.

Ciidamada Liyuu Booliska ee Ismaamulka Soomaalida ayey ku eedeeyeen in ay beegsanayaan Beeshooda dhibaato iyaga u gaar ahna lagu hayo.

Mid ka mid ah Odayaasha ayaa sheegay in dhulkii iyaga laga barakiciyay la dejiyay Beesha uu ka soo jeedo Madaxweynaha islamarkaana degaan ay iyaga leeyihiin oo lagu magacaabo Gar Cillaan degmo loo aqoonsaday lana dejiyay dadka cusub ee Gobolka lagu beerayo.

Waxaa uu sheegay in Magaalooyinkoodii, Baraagihii ay biyaha ka cabayeen iyo dhul beeroodkoodiiba la geliyay cagaf lana baabi’iyay isaga oo ku eedeeyay in ay arrintaas ka wada warqabaan madaxda ugu sarreysa Ismaamulka Soomaalida.

Odaygan ayaa sheegay in warqado cabasho ah ay geeyeen Maamulka Gobolka Qorraxey, Ismaamulka Soomaalida ee fadhigiisu yahay Jigjiga iyo dowladda Federaalka ah ee Itoobiya,dhamaantoodna aysan waxba ka qaban Karin.