Maxaa sababay xil ka qaadista Wasiirkii Batroolka & Macdanta Soomaaliya Cabdirisaaq Cumar?

Cabdirisaaq Cumar Maxamed oo shalay laga qaaday xilka Wasiirka Wasaaradda Batroolka iyo Macdanta Xukuumadda Federaalka Soomaaliya ayaa faah-faahin ka bixiyay sababta looga qaaday xilkaas maadaama lagu tiriyo Dadka ku dhow Madaxweynaha JFS.

Waxa uu sheegay in ay saaxiibo dhow yihiin Madaxweynaha balse ay ku kala fogaadeen siyaasadda la xiriirta tabashada reer Hiiraan ay ka qaabaan Dowladda Federaalka oo qaabka loo wajahayo isku fahmi waayeen sida uu hadalka u dhigay.

“Waxa laga yaabaa in ay dadku iswaydiinayaan sababta xiligan ku soo aadisay xil ka qaadistayda, iyada oo ay dad badan tuhmayeen in uu jiray xiriir qota dheer oo igala dhexeeyay Madaxweynaha.” Ayuu yiri Cabdirisaaq Cumar Maxamed.

Waxa uu intaas kusii daray “Waa dhab in uu jiro xiriirkaasi, xil ka qaadistayduna waxa ay ku timid kala aragti duwanaansho la xiriirta sida loo wajahayo xalinta tabashooyinka reer Hiiraan ay ka qabaan maamulka Hirshabeele, tabashooyinkaas oo soo jiray ilaa bilawgii dhismahii HirShabeele, muddo xileedkii hore ee Madaxweyne Xasan Sheekh”.

Cabdirisaaq Cumar ayaa tilmaamay in reer Hiiraan ay u baahan yihiin in gunta hoose loo dego ka garaabista tabashada ay ka qabaan Dowlad-Goboleedka ay ka tirsan yihiin ee Hir-Shabeelle, haddii aan la helin xalkana arrintu sii kala fogaan karto sida uu yiri.

“Madaxweynaha, aniga iyo siyaasiyiinta kale waxaan ka midaysnayn in tabashooyinka ay qabaan reer Hiiraan ay yihiin tabashooyin dhab ah una baahan xal ay qayb ka yihiin maamulka HirShabeele iyo dowladda dhexe. Hase ahaatee waxaa jiray kala aragti duwanaasho ah xalka ugu haboon oo loo xallin karo tabashooyinkaas” Cabdirisaaq Cumar.

Aragtidiisa ayuu ku sifeeyay in uu aaminsan yahay dib u heshiisiin laga dhex billaabo reer Hiiraan si uu maamul Goboleedkaas uu u noqdo mid ka dhisan dhinac weliba loona baahan yahay in si caddaalad ah loo eego arrimaha keenay tabashada.

“Aniga waxaan qabay in xalka laga bilaabo reconciliation iyo in beelaha labada deegaan ee ku midaysan maamulka HirShabeele ee leh oday dhaqameed, Culumo iyo siyaasiyiin laga qaybgeliyo kana heshiiyaan sida ay noqonayso HirShabeelada cusub, lagana heshiiyo arrimaha gundhigga u ah tabashooyinka oo ay ka mid yihiin Caasimadda iyo Baarlamaanka HirShabeele” ayuu hadalkiisa kusii daray Cabdirisaaq Cumar Maxamed.

Wasiirka lagu baddelay ayuu u hambalyeeyay Cabdirisaaq Cumar Maxamed oo shalay laga qaaday Xilka Wasiirka Wasaaradda Batroolka & Macdanta Xukuumadda Federaalka Soomaaliya.

Mustaqbal