Mareykanka oo sheegay in duqeymo ka fuliyeen Buuraha gobolka Bari

Taliska Mareykanka ee Afrika (AFRICOM) ayaa sheegay in ay fuliyeen duqeyn cirka ah, taasoo lagu bartilmaameedsaday xubno ka tirsan Daacish, kadib codsi rasmi ah oo kaga yimid Dowladda Federaalka Soomaaliya.

Duqeyntan ayaa ka dhacday deegaanno ku yaalla koofur-bari magaalada Boosaaso, gaar ahaan dhulka buuraleyda ah, halkaasi oo ay howlgallo ka dhan ah Daacish ka socdaan.

War saxaafadeed ka soo baxay Taliska AFRICOM ayaa lagu sheegay in Duqeyntan ay ka tahay iskaashiga Mareykanka iyo Dowladda Federaalka Soomaaliya, ujeedkeeduna ahaa in lagu wiiqo awoodda Daacish ee ku aaddan weerarro halis ku ah danaha Mareykanka, ciidamada saaxiibka la ah iyo muwaadiniinta caalamka.

“Duqeyntan waxay ahayd is-difaac oo lagu taageerayo ciidamada Soomaaliyeed, si looga hortago khataraha ay ISIS-Somalia ku hayso gobolka iyo danaha Mareykanka,” ayuu yiri afhayeen u hadlay AFRICOM.

“Waxaan sii wadi doonnaa iskaashi buuxa oo aan la leenahay Dowladda Federaalka si loo baabi’iyo kooxahan xagjirka ah ee khatarta ku ah shacabka Soomaaliyeed,” ayuu hadalkiisa raaciyay.

AFRICOM waxay sidoo kale xaqiijisay in aysan shaacin doonin faahfaahinta unugyada iyo qalabka la adeegsaday, si loo ilaaliyo amniga hawlgallada socda.

Deegaanka Togga Miiraale oo ku yaalla koofur-bari Boosaaso ayaa waxaa saacadihii la soo dhaafay ka socday dagaal iyo duqeymo lala beegsanayo xubnaha Daacish oo isku dayay in ay weeraan saldhigyada ciidamada Daraawiishta Puntland.

Mustaqbal