Isku dhacyo ka dhacay Khartuum iyada oo lagu gudajiro xaaladda xabbad-joojinta ah.

Isku dhacyo u dhaxeeya Ciidamada Militariga Suudaan iyo kuwa Gurmadka Degdega ah (RSF) ayaa ka dhacay Magaalada Khartuum iyada oo ay dalkaas ka jirto xaaladda xabbad-joojinta ah oo Sacuudiga ay ku gaareen wakiillo ka kala socda labada dhinac.

Dadka deegaanka ayaa Warbaahinta u xaqiijiyay in ay maqleen rasaas xooggan iyo jug ka dhacday mid kamid ah goobaha ay isku hor fadhiyaan ciidamadaan ku dagaalamaya Magaalada Khartuum ee Caasimadda Jamhuuriyadda Suudaan.

Lama soo sheegin waxyeello ka dhalatay rasaastaas balse waxa ay dareen gaar ah gelisay dadka daneynaya xaqiijinta xabbad-joojinta ay wadagaleen dhinacyadaan hubeysan ee dhanba dhanka kale damacsan in uu awood ahaan u maquuniyo.

Dowladaha Sacuudiga iyo Mareykanka oo kor kala socda xabbad-joojinta weli kama hadlin waxayse dhowr jeer ka digeen in dib loosoo cusbooneysiiyo dagaalka iyada oo meel la iska dhigayo xabbad-joojintaas.

Dad badan ayaa gargaar bani aadamnimo u baahan maadaama colaadda Suudaan ay kasii dartay dhibaatada dhanka cunnada ah ee ka jirtay waddankaan dhaca Waqooyiga Qaaradda Afrika oo waxaa baahan dad badan oo aan awoodin in ay helaan raashinka ay u baahan yihiin.

Hay’adaha hoostaga Qaramada Midoobay iyo kuwa madaxabannaan ayaa ku dooday in culeys & cadaadis xooggan la saaro Ciidamada dagaalamaya si loo helo gargaarka ay u baahan yihiin Malaayiinta Ruux ee reer Suudaan.

Mustaqbal