Dowladda Soomaaliya oo war ka soo saartay dhaqdhaqaaqyada ka socda gobolka Gedo

Wasaaradda Amniga Gudaha Soomaaliya ayaa xaqiijisay in Ciidamada Federaalka ay ka howlgalayaan gobolka Gedo, si ay u soo celiyaan ammaanka iyo kala dambeynta gobolkaasi.

War-saxaafadeed ka soo baxay Wasaaradda Amniga ayaa waxaa lagu sheegay in ay jiraan shaqsiyaad colaad iyo fowdo ka wada gobolka Gedo, kuwaasi oo ka tirsan Maamulka Jubbaland.

Wasaaraddu waxay si gaar ah u xustay Madaxweynaha Jubbaland Axmed Madoobe iyo ku xigeenkiisa Maxamuud Sayid Aadan oo la sheegay in ay ku lug leeyihiin falal amniga lid ku ah.

“Ciidamada Dowladda Federaalka ayaa si buuxda ugu sugan yihiin gobolka, halkaasoo ay ka wadaan howlgallo ay kaga hortagayaan khataraha amniga, iyadoo ay gacan ka helayaan shacabka deegaanka, tallaabo ayaa laga qaadi doona cid kasta oo sii waddo falkooda xun” ayaa qoraalka Wasaaradda Amniga gudaha.

Dhinaca kale, Dowladda Federaalka ayaa shacabka Gobolka Gedo iyo maamulka deegaanka ugu baaqday in ay doorkooda ka qaataan nabadda, iyaga oo taageeraya dowladda.

Hadalka Dowladda Federaalka ayaa ku soo aadaya xilli Ciidanka Itoobiya iyo kuwa Jubbaland ay dhaqdhaqaaqyo ka wadaan gobolka Gedo, iyagoo culeys saaraya magaalada Beledxaawo.

Hoos ka akhriso War-saxaafadeedka

Mustaqbal