Dowladda Soomaaliya oo dalka dib ugu soo celisay 148 muwaadin oo ku xayirnaa Yemen

Dowladda Federaalka Soomaaliya ayaa dalka dib ugu soo celisay 148 muwaadin Soomaaliyeed, oo ay ku jiraan carruur, kuwaas oo ku xayirnaa dalka Yemen.

Muwaadiniintan ayaa maanta laga soo dejiyay Garoonka Diyaaradaha Caalamiga ah ee Aadan Cadde ee magaalada Muqdisho, halkaas oo ay ku soo dhaweeyeen mas’uuliyiin sare oo ka tirsan dowladda Federaalka Soomaaliya.

Diyaarad ay leedahay shirkadda duulimaadyada ee FlyAden ee dalka Yemen ayaa muwaadiniintan ka soo qaaday magaalada Cadan, iyadoo duulimaad toos ah ku keentay magaalada Muqdisho.

Wasiir ku-xigeenka Wasaaradda Arrimaha Dibadda Soomaaliya, Xasan Nadaara, ayaa sheegay in muwaadiniintan ay dhibaatooyin ku qabeen dalka Yemen, isaga oo xusay in dib u soo celintooda ay iska kaashadeen dowladda Soomaaliya iyo hay’adaha IOM, UNHCR iyo Midowga Yurub.

Sidoo kale, wasiir ku-xigeenka ayaa sheegay in dowladda Soomaaliya ay sannadkan gudihiisa dalka dib ugu soo celisay in ka badan 1,500 oo muwaadin Soomaaliyeed.

Mustaqbal