Ciidamada amaanka oo xalay howlgallo ka sameeyay degmooyinka Wadajir iyo Dharkiinleey.

Ciidamada dowladda Soomaaliya, ayaa xalay xiligii AF-Furka kadib waxa ay howlgallo baaritaana ah ka sameeyeen xaafado ka tirsan degmooyinka Wadajir iyo Dharkiinleey, halkaas oo mararka qaar ay ka dhacaan falal lidi ku ah amaanka Caasimada.

Sida wararku sheegayaan howlgalka oo Guri guri ahaa, ayaa si gaar ah looga sameeyay inta u dhexeysa Xaafadaha Nasteexo ilaa Suuqa Weyn oo Wadajir ah, halka dhanka Dharkiinleey laga sameeyay Xaafadaha Xoosh ilaa Tabakaayo Madoow.

Qaar kamid ah dadkii baaritaanada lagu soo qabtay, ayaa inoo sheegay in Su’aalo weydiin dheer kadib la sii daayay inta badan raggi la qabtay, balse laamaha amaanka ay hore u kexeysteen dad looga shakiyay Shabaabnimo.

Baaritaanada meelaha ay ka socdaan, ayaa waxaa hakad galay isu socodka gaadiidka iyo meelha qaar ee ganacsiga, waxaana Ciidamada ay sidoo kale ahaayeen kuwo dadka gawaraida kala dagayay.

Ma jirto wali wax war ah oo Saraakiisha amaanka ka biixyeen baaritaanadan, balse waxa ay qeyb ka noqonayaan howlgalada amniga lagu sugayo bishan Ramadaan ee laamaha amaanka ka wadaan Caasimada.