C/raxmaan C/shakuur oo soo jeediyay in si dhab ah loo baaro Drones uu dalka keensaday xildhibaan Sakariye.

Hogaamiyaha xisbiga mucaaradka ah ee Wadajir C/raxmaan C/shakuur Warsame, ayaa ka hadlay diyaarado Drones ah oo todobaadkii hore ay garoonka Muqdisho ku qabteen ciidamada Nabad Sugida iyo Sirdoonka Qaranka.

Mr. Warsame oo goordhow qoraal ku soo daabacay bartiisa Facebook, ayaa soo jeediyay in la xaqiijiyo waxa laga damacsanaa diyaaradahan Drones-ka ah ee Muqdisho lagu qabtay, isagoo muujiyay cabsi ku aadan in lagu maleegi karo fal lamid ah midkii xalay uu ka badbaaday ra’iisul wasaaraha dalka Ciraaq.

“Maadama xalay Raysalwasaaraha Ciraaq uu ka badbaaday isku day dil oo loo adeegsaday drone qarax loogu soo xiray, waxaan dalbanaynaa in si madaxbannaan loo xaqiijiyo waxa ay tahay drone ka la sheegay in Xamar lagu qabtay” ayuu yiri.

Saraakiil ka tirsan Nabad-Sugidda Soomaaliya , ayaa sheegay inay ka cabsi qabaan in diyaaradahan ay halis ku yihiin amniga, iyada oo uu jiro shaki weyn oo ku aadan ujeedka rasmiga ah ee loo keenay dalka.

C/raxmaan C/shakuur Warsame, ayaa dhinaca kale hay’adaha iyo dowladaha taageera dalkan ka dalbaday iney hubiyaan halka ay u socdeen rasmi ahaan diyaaradahan.

“Waa in hay’adaha iyo dawladaha naga gacansiiya tababarka ciidanka iyo arrimaha amniga ay hubiyaan nooca drone la qabtay, iyo halka ay ku socotay” ayuu hadalkiisa ku sii daray.

Xildhibaan Zakariye Maxamuud Xaaji Cabdi, ayaa sheegtay diyaaradahan, isaga oo ku dooday inuu u keensaday inuu u adeegsado inay waraabiyaan beero ku yaalla Puntland

Si kastaba, Xogta aan helnay ayaa sheegeysa in diyaaradaha ay yihiin illaa lix, waxaana laga soo iibiyey dalka Turkiga, iyada oo dalka la keenay ayaga oo kala furfuran si gudaha dalka loogu rakibo., Diyaaradaha ayaa waxaa sidoo kale la socday oo lala qabtay laba farsamo-yaqaan oo u dhashay dalka Turkiga, kuwaasi oo qorshuhu ahaa inay diyaaradaha rakibaan, kadibna howl-geliyaan.

Injineeradan ayaa la sii daayay markii danbe kadib markii ay kiiskan soo fara gelisay safaarada Turkiga ee Muqdisho.