Shiinaha oo cambaareeyay hadal ka soo yeeray Mareykanka

Dowladda Shiinaha ayaa maanta ku dhawaaqday inay qaadi doonto  tallaabooyinka lagama maarmaanka ah si ay u difaacdo danteeda iyo xuquuqda ganacsiyadeeda, ka dib markii Mareykanku uu shaaciyay qorshe lagu ballaarinayo cunaqabataynta dhaqaale ee ka dhanka ah dalka Iran iyo cid kasta oo xiriir ganacsi la leh, oo uu ku jiro Shiinuhu.

Afhayeenka Wasaaradda Arrimaha Dibadda ee Shiinaha, Lin Jian, oo ka hadlayay shir jaraa’id, ayaa cambaareeyay hadalka ka soo yeeray Mareykanka.

Waxa uu carrabka ku adkeeyay in iskaashiga u dhexeeya Shiinaha iyo Iran uu yahay mid ku dhisan sharciga caalamiga ah, uuna yahay mid xalaal ah oo aan mudnayn in la farageliyo ama la carqaladeeyo.

Tallaabadan ayaa timid ka dib markii Xoghayaha Maaliyadda ee Mareykanka, Scott Bessent, uu Isniintii ku dhowaaqay wax uu ku tilmaamay weerarkii ugu weynaa ee dhanka maaliyadda ee abid  lagu qaado Iran.

Bessent ayaa ka digay in waddan kasta, bangi, ama shirkad kasta oo xiriir dhaqaale la leh Iran ay la kulmi doonaan go’doon caalami ah haddii aysan xiriirka u jarin xukuumadda Teheran.

Shiinaha ayaa ah dalka ugu weyn ee iibsada saliidda Iran, in kasta oo ganacsigaasi uu hoos u dhacay sanadihii u dambeeyay sababo la xiriira go’doominta Mareykanku ku hayo dekedaha Iran.

Mustaqbal