Ra’iisul Wasaare Kheyre oo la kulmay Mas’uuliyiinta Ammaanka.

Ra’iisul Wasaaraha Xukuumadda Soomaaliya Xasan Cali Kheyre ayaa xalay kormeer kedis ah ku tagay Baraha lagu hubiyo gaadiidka ee ku yaalla Waddooyinka Wadnaha, Sodonka iyo Warshada.

Waxa uu la kulmay askartii heegaanka ku jirtay isaga oo ka xog wareystay qaarka ay u howlgalayaan.

Cabdinaasir Siciid Muuse wasiir ku xigeenka Wasaaradda Amniga Soomaaliya ayaa sheegay in Ra’iisul Wasaaraha Kormeerkiisa aan jirin cid ku wehlisay.

Ujeedka waxa uu ku sheegay in uu qiimeeyo Askarta sugaya ammaanka ee ku sugan Baraha kontorolaada iyaga oo aan lagu wargelin ama ka war heyn socdaalkiisa.

Intaas kadib waxa uu kulan gaar ah la qaatay mas’uuliyiinta ammaanka isaga oo kala hadlay sidii loo xoojin lahaa howlgalada, maadaama qaybaha dambe ee bisha Ramadaan lagu jiro, isla markaana ay soo dhawdahay munaasabadda Ciidul fidriga.

Wasiir ku xigeenka Wasaaradda Amniga ayaa sheegay in Xasan Cali Kheyre Ra’iisul Wasaaraha Xukuumadda Soomaaliya uu u gudbiyay saraakiisha waxyaabaha uu kula soo kulmay goobaha uu tagay inkasta oo uusan Warbaahinta u sheegin.

Saddexdii habeen ee lasoo dhaafay mas’uuliyiinta Dowladda waxa ay kormeer ku tagayeen goobaha laga hubiyo gaadiidka ee ku yaalla Magaalada Muqdisho, waxaana socdaalkooda ay ku sifeeyeen in ay ku qiimeynayaan howlgalada ciidamada.