Dowladda Soomaaliya oo war ka soo saartay tillaabada Faransiiska ku aqoonsayo Falastiin

Dowladda Federaalka Soomaaliya ayaa ka hadashay go’aanka Faransiiska ku aqoonsanayo shacabka iyo dowladda Falastiin, tillaabadaasi oo Mareykanka iyo Israa’iil ka caroodeen.

War-saxaafadeed ka soo baxay Wasaaradda Arrimaha Dibadda Soomaaliya ayaa lagu sheegay in Shacabka Falastiiniyiinta xaq u leeyihiin dowlad madaxbanaan si waafaqsan shuruucda caalamiga ah iyo qaraarrada Qaramada Midoobay.

“Dowladda Soomaaliya waxay u aragtaa go’aanka Faransiiska mid geesinimo leh oo kusoo beegmaya xilli ku habboon, isagoo ka qeyb qaadanaya Nabadda Caalamka” ayaa lagu yiri War-saxaafadeedka Dowladda.

Sidoo kale, Soomaaliya ayaa tilmaamtay in ay garab taagan tahay shacabka Falastiiniyiinta oo muddo dheer wajahaya dagaalka iyo weerarada Israa’iil.

Tillaabada Faransiiska ku aqoonsanayo shacabkaasi ayaa waxaa ka hor yimid Mareykanka iyo Israa’iil oo xulafo dhow ah.

Faransiiska ayaa noqonaya mid kamid ah dalalka reer galbeedka ee jabiyay go’aanka in aan la aqoonsan Falastiin.

Inkastoo in ka badan 142 dal oo ka mid ah 193-ka waddan ee xubnaha ka ah Qaramada Midoobay ay aqoonsadeen ama ay wadaan qorshaha, haddana dalalka awoodda leh sida Maraykanka, UK iyo Jarmalka ayaa weli ka caga-jiidaya.

Hoos ka akhriso Bayaanka Dowladda Soomaaliya oo ku qoran Ingiriis.

Mustaqbal