AMISOM oo dil ku xukuntay Askar Dad rayid ah ku dishay Shabeelaha Hoose.

Howlgalka AMISOM ayaa ku dhawaaqay in lasoo gaba-gabeeyay maxkamadeynta 5-Askari oo katirsan Ciidanka Uganda kuwaas oo loo xiray in ay ka dambeeyeen dil arxan-darro oo ay u geysteen Dad rayid ah.

Ciidan katirsan kuwa Uganda ayaa deegaanka Golweyn ee Gobolka Shabeelaha Hoose waxa ay ku toogteen dad rayid ah 10-kii August 2021 iyaga oo markii dambe ku qarxiyay miino sida ay sheegeen ehelkooda.

Arrintaan ayaa sababtay dibadbaxyo xooggan oo ay sameeyeen ehelka 7-da ruux ee gacanta Askarta Uganda ku baxay, ku dhawaad 3-bil ayaa meydkooda oo go’go’an lagu hayay Qaboojiye waxaana ugu dambeyn aaskooda dalbatay XFS.

Maxkamadeynta Askartaan ayaa ka socotay Xerada Xalane, labo kamid ah waxaa lagu xukumay dil halka saddexda kale ay qaadanayaan 39-sano oo xabsi ah sida lagu sheegay xukunka Maxkamaddu ay ridday.

Madaxweynaha Uganda Yoweri Museveni ayaa 19-kii August 2021 qirtay in askartiisa ku sugan Gobolka Shabeelaha ay dileen Dad rayid ah, waxaana uu shaaciyay in la xiray askartaas si dacwad loogu soo oogo.

Afhayeenka Beeralleyda Gobolka Shabeellaha Hoose Xuseen Cismaan Waasuge oo ka qaybgalay fadhiyada Maxkamadda ee dhageysiga heerarka kala duwan ee kiiskaan uu soo maray ayaa BBC-da u sheegay in saraakiil ka socda Dowladda Uganda muqdisho ay usoo gaareen maxkamadeynta askartaas.

Xuseen ayaa sheegay in labada sarkaal ee dilka lagu xukumay ay kala yihiin “Kabtanka Ciidanka watay & ku xigeenkiisa”, halka Askarigii Meydka mina ku qarxiyay lagu xukumay 39-sano oo xabsi ah sida uu hadalka u dhigay.

AMISOM ayaa dhageysatay hal marqaati oo Soomaali ah kuna sugnaa beerta dadkaan laga soosaaray & 6-askari oo katirsan Ciidanka Uganda ee goobjooga u ahayd dhacdadaan, waxaana sidaas lagu gaaray xukunka lagu riday 5-Askari ee u dhashay Uganda.

Mustaqbal