Miisaaniyadda Dowladda Soomaaliya ee 2027 oo hoos u dhacday 9.2%

Golaha Wasiirrada Xukuumadda Federaalka Soomaaliya ayaa ansixiyey miisaaniyadda dowladda ee sannadka 2027, taas oo gaareysa $1,259,238,253, marka loo eego $1,386,807,242 oo ahayd miisaaniyaddii sannadka 2026.

Tani ayaa ka dhigan in miisaaniyadda cusub ee dowladda Soomaaliya ay hoos u dhacday $127.6 milyan, una dhiganta 9.2%.

Hoos u dhaca miisaaniyadda ayaa imaanaya xilli Soomaaliya ay wajahayso marxalad kala guur ah, isla markaana ay yaraadeen deeqihii iyo taageeradii dhaqaale ee ay dowladda ka heli jirtay beesha caalamka.

Si kastaba ha ahaatee Wasaaradda Maaliyadda Xukuumadda Federaalka Soomaaliya, oo soo diyaarisay miisaaniyadda ay Golaha Wasiirradu ansixiyeen, weli ma aysan shaacin sababaha rasmiga ah ee keenay hoos u dhaca ku yimid miisaaniyadda sannadka soo socda.

Dhanka kale, Dowladda Federaalka Soomaaliya ayaa dhawaan sheegtay inuu kordhay dhaqaalaha gudaha dalka, hase yeeshee kororkaasi kama muuqdo miisaaniyadda 2027 oo ka hooseysa tii sannadkii hore.

Arrintan ayaa dhalinaysa su’aalo la xiriira saameynta kobaca dakhliga gudaha iyo yaraanshaha deeqaha dibadda ay ku yeesheen qorshaha maaliyadeed ee dowladda.

Hoos u dhaca miisaaniyadda 2027 ayaa sidoo kale ah mid xusid mudan, maadaama uu yahay hoos u dhicii ugu weynaa ee miisaaniyadda dowladda tan iyo markii ay xukuumaddan talada qabatay, sida xogta la hayo muujinayso. Miisaaniyadda ayaa hoos u dhacday 9.2%, taas oo ka duwan jihadii kororka ee lagu arkayay miisaaniyadaha sannadihii hore.

Mustaqbal