Maxaa lagu xasuusta isku daygii Afgembi ee ka dhacay Turkiga 2016?

15-kii July 2016, dalka Turkiga wuxuu la kulmay isku day afgambi militari oo ay fuliyeen xubno ka tirsan ciidamada qalabka sida, iyada oo la xasuusto doorka shacabka Turkiga ee difaaca Dowladda Madaxweyne Recep Tayyip Erdogan.

Fiidkii Jimcaha 15-ka July 2016, cutubyo ka tirsan milatariga Turkiga ayaa la wareegay waddooyinka,  buundooyinka Istanbul, garoomo diyaaradeed iyo xarumo warbaahineed.

Ciidamadaas ayaa ku dhawaaqay in ay xukunka la wareegeen si ay u ilaaliyaan dimuqraadiyadda iyo sharciga dastuuriga ah.

Hase yeeshee, Madaxweyne Erdoğan oo ku sugnaa magaalada Marmaris, ayaa si deg deg ah ula hadlay taleefishinka CNN Türk, isagoo ugu baaqay shacabka inay kasoo horjeestaan afgambiga.

Dadka reer Turkida waxay si geesinimo leh ugu soo baxeen waddooyinka, iyagoo hor istaagay taangiyada milatariga. Waxaa halkaasi ku geeriyooday  in ka badan 250 qof, halka laba kun oo kale ay dhaawacmeen.

Dowladda Turkiga waxay ku dhawaaqday xaalad degdeg ah oo socotay muddo labo sano ah, iyadoo sameysay howlgal ballaaran.

Kumanaan askari iyo saraakiil ciidan ah ayaa la xiray, waxaana shaqada la eryay boqalaal isugu jira mas’uuliyin ka kala tirsana laamaha Dowladda.

Dowladda Turkiga waxay Afgambigaasi ku eedaysay kooxda Fatxullahi Gülen oo fadhigoodu yahay Mareykanka, inkasta oo ay iska fogeeyeen.

Afgambigii 2016 wuxuu iftiimiyay awoodda shacabka marka ay mideysan yihiin, balse waxaa jirta dhaleeceyn loo jeedinayo Xukumadda Madaxweyne Erdogan, taasi oo la xiriirta in ay gacan bir ah ku qabatay dadkii lagu tuhmay mucaaradnimada.

Mustaqbal