Indha-Qarshe oo noqday sarkaalkii 3aad oo gaaray Derajada Sarreeye Guud

Madaxweynaha Dowladda Federaalka Soomaaliya, Xasan Sheekh Maxamuud, ayaa Taliyihii hore ee Ciidanka Xoogga Dalka Soomaaliyeed, Daahir Aadan Cilmi (Indha-Qarshe), u dallacsiiyay darajada Sarreeye Guud, taas oo ka dhigaysa sarkaalkii saddexaad ee taariikhda ciidamada Soomaaliya gaara darajadaas.

Janaraal Daahir Indha-Qarshe waxaa darajadan ka horreeyay Alle ha u naxariistee Maxamed Cali Samatar iyo Bashiir Maxamed Jaamac (Bashiir Goobe), oo hadda ah Wasiirka Deegaanka iyo Isbeddelka Cimilada ee Xukuumadda Federaalka Soomaaliya.

Sarreeye Guud Daahir Indha-Qarshe ayaa Ciidanka Xoogga Dalka Soomaaliyeed ku biiray sannadkii 1968-kii, isaga oo tababbarro ciidan oo kala duwan ku qaatay gudaha dalka iyo dibaddiisa.

Wuxuu laba jeer soo noqday Taliyaha Ciidanka Xoogga Dalka Soomaaliyeed, sannadihii 2013 iyo 2018, isaga oo door muhiim ah ku lahaa hoggaaminta iyo maamulka ciidamada.

Daahir Indha-Qarshe ayaa ku dhashay magaalada Gaalkacyo ee xarunta gobolka Mudug sannadkii 1948-kii. Waxbarashadiisii aasaasiga ahayd waxa uu ku soo qaatay magaalooyinka Buulo Burde, Jowhar iyo Muqdisho, ka hor intii uusan u gudbin tababarrada milatari.

Intii lagu jiray dagaalkii Soomaaliya iyo Itoobiya ee sannadkii 1977-kii, Daahir Indha-Qarshe wuxuu ka mid ahaa saraakiishii hoggaaminaysay qaybta madaafiicda ee Ciidanka Xoogga Dalka Soomaaliyeed.

Ciidamadii uu qaybta ka ahaa ayaa ka mid ahaa kuwii dagaalkaas ku qabsaday magaalooyinka Qabri Dahare iyo Dhagaxbuur, kuwaas oo ku yaalla dhulka Soomaali Galbeed.

Doorkiisa guutada uu hoggaankeeda qaybta ka ahaa ee dagaalka, ayaa sababtay in guddoonsiiyo Billad Dahab ah oo uu bixiyay madaxweyne Maxamed Siyaad Barre, kaddib guushii laga gaaray difaacyadii ciidamada Itoobiya ee goobahaas.

Dallacsiintiisa cusub ayaa ku soo beegmaysa kaddib muddo dheer oo uu ku soo jiray ciidanka xoogga milatari, isaga oo ka mid ah saraakiishii taariikhda ku leh Ciidanka Xoogga Dalka Soomaaliyeed.

Mustaqbal